Detaje të reja kanë dalë në dritë mbi ngjarjen tragjike të ndodhur në orët e para të mëngjesit në Manëz të Durrësit, ku dy persona humbën jetën pas një konflikti që nisi për motive të dobëta.

Sipas burimeve zyrtare, Daniel Pepa, 21 vjeç, është autori i shpallur në kërkim për vrasjen e Flori Paluçit, 33 vjeç. Hetimet tregojnë se Pepa e qëlloi Paluçin me armë zjarri pasi ky i fundit kishte vrarë shokun e tij, Aranit Kurtin, 23 vjeç, vetëm pak çaste më parë.

Skenari tragjik ndodhi brenda pak minutash: fillimisht Flori Paluçi vrau Aranit Kurtin, ndërsa më pas u qëllua për vdekje nga Daniel Pepa, i cili u largua menjëherë nga vendngjarja.

Ngjarja e rëndë ndodhi rreth orës 01:45 të mëngjesit të 22 tetorit 2025, në afërsi të një karburanti në Manëz, pas një debati banal që kishte nisur në ambientet e një lokali.

Ndërkohë, një grup i posaçëm hetimor, nën drejtimin e Prokurorit të Rrethit Gjyqësor Durrës, po vijon punën për të dokumentuar të gjitha rrethanat e vrasjes së dyfishtë. Hetuesit po mbledhin prova materiale dhe dëshmi për të zbuluar nëse në konflikt kanë qenë të përfshirë edhe persona të tjerë.

Forcat e Policisë së Durrësit kanë vënë në lëvizje të gjitha strukturat për kapjen e 21-vjeçarit Daniel Pepa, i cili aktualisht ndodhet në arrati.