Një ngjarje e rëndë është regjistruar më 27 nëntor në fshatin Mamëz, Kukës, ku dyshohet se babë e bir kanë qëlluar me armë zjarri në drejtim të një dyqani në lagjen Drinas, duke dëmtuar xhamat e fasadës së tij.
Autorësia e ngjarjes është zbardhur nga shërbimet e Policisë së Kukësit, në bashkëpunim me specialistët për Hetimin e Krimeve, nën drejtimin e Prokurorisë, në kuadër të operacionit policor të koduar “Drinas”.
Në kuadër të këtij operacioni:
• Xh. M., 59 vjeç, u arrestua dhe u vu në pranga,
• M. M., 26 vjeç, djali i tij, u shpall në kërkim, pasi nuk u gjet gjatë kontrolleve në banesë.
Policia njofton se babë e bir dyshohet se kanë përdorur një automjet për të lëvizur gjatë kryerjes së veprës. Ata akuzohen për veprat penale:
• “Mbajtja pa leje dhe prodhimi i armëve, armëve shpërthyese dhe i municionit”,
• “Shkatërrimi i pronës”,
• “Prishja e qetësisë publike”.
Ngjarja ka lënë pas dëmtime materiale në dyqanin në pronësi të T. O., ndërsa policia vijon punën intensive për kapjen e djalit të shpallur në kërkim. Materialet procedurale i janë kaluar Prokurorisë për veprime të mëtejshme.
