Policia e Kosovës ka arrestuar shtatë persona, të dyshuar për planifikimin dhe kryerjen e vrasjes së rreshterit Muhamed Lika, ngjarje që tronditi vendin më 1 prill, kur efektivi u ekzekutua në hyrjen e banesës së tij në Kaçanik, teksa po kthehej nga puna.

Sipas deklaratave të drejtorit të Policisë, Gazmend Hoxha, dhe kryeprokurorit të Ferizajt, Burim Çerkini, dyshimet e para tregojnë se motiv i vrasjes ka qenë detyra zyrtare e Likës si pjesëtar i strukturave të rendit.

“Dyshimet e deritanishme janë se vrasja ka ndodhur për shkak të detyrës së tij si rreshter policie. Megjithatë, kjo do të konfirmohet pas intervistimit të të dyshuarve dhe analizimit të dëshmive”, deklaroi Hoxha.

Në mesin e të arrestuarve ndodhet një ish-pjesëtar i FSK-së dhe një 18-vjeçar, ndërsa disa prej tyre kanë të kaluar kriminale dhe janë lidhur më parë me prirje ekstremiste.

Aksioni u zhvillua në Kaçanik dhe në një fshat të Klinës, ku u bastisën nëntë lokacione dhe u sekuestruan dy vetura, telefona, laptopë, një armë zyrtare, maska, tyta armësh dhe fishekë.

Arma e krimit ende nuk është gjetur, ndërsa hetimet vazhdojnë. Prokuroria ka bërë të ditur se do të kërkojë paraburgim për të arrestuarit.

Muhamed Lika u qëllua në orën 23:00 të 1 prillit dhe, ndonëse u transportua menjëherë në Qendrën e Mjekësisë në Kaçanik, nuk arriti t’u mbijetonte plagëve. Vrasja e tij është konsideruar një akt i rëndë kundër sigurisë dhe rendit, duke ngritur shqetësime për sigurinë e punonjësve të rendit në Kosovë.