Kreu i SPAK, Altin Dumani, vë në dukje qarkullimin e gjerë të parave cash, të cilat tregojnë për një skemë të shqetësueshme të pastrimit të parave. Sipas hetimeve të vitit 2023, ai thekson se ligji është i mirë, por institucionet duhet të punojnë për zbatimin e tij. Dumani bën thirrje për një bashkëpunim të thellë mes institucioneve për të përballuar këtë problem.

“Ajo që unë e kam thënë dhe më parë, s’mund të bëjë SPAK i vetëm gjithë këto gjëra. SPAK është skaji fundor. Hetimet për vitin 2023 tregojnë që ka qarkullim të madh të parasë cash. Legjislacioni, është i mirë, problemi është tek zbatimi, institucionet duhet ta zbatojnë. Psh rasti i raportimit nga noterët, duhet të raportojnë tatimet. Ka një tipologji, zmadhimi i kapitalit fiktiv që bëjnë shoqëritë tregtare. Është rast tipik i pastrimit të parave. Një ndër rastet që kam patur ndërmend kur kam thënë se duhet të rritet bashkëpunimet. Ia kam thënë drejtori të takimeve duhet të fokusoheni këtu. P.sh Një shoqëri e blej 200 mijë lekë të reja dhe pas dy muajsh bëj një zmadhim kapitali dhe e vlerësoj 300 mln lekë të reja”, tha Dumani.