Një grup arkeologësh nga Italia dhe Skocia kanë bërë një zbulim të jashtëzakonshëm pranë kompleksit të Piramidave të Gizës. Ata pretendojnë se kanë identifikuar një “anomali” misterioze nëntokësore, e cila mund të tregojë praninë e një strukture të fshehur poshtë piramidave.

Sipas mediave ndërkombëtare, shkencëtarët përdorën teknologji të avancuara, si radari depërtues në tokë (GPR) dhe tomografia me rezistencë elektrike (ERT), për të analizuar zonën pa kryer gërmime. Këto metoda kanë zbuluar boshte dhe korridore të mundshme, duke ngritur pyetje mbi qëllimin dhe origjinën e tyre.

Ekspertët theksojnë se ndonëse janë gjetur tunele dhe dhoma të fshehura nën piramida më parë, nuk ka ende prova të qarta që të mbështesin teorinë se poshtë kompleksit të Gizës mund të ekzistojë një qytet i madh nëntokësor. Megjithatë, studimet do të vazhdojnë gjatë vitit 2025 për të hedhur më shumë dritë mbi këtë mister të lashtë.

Ky zbulim ka ngjallur entuziazëm në komunitetin shkencor dhe ndër adhuruesit e arkeologjisë, të cilët presin me padurim rezultatet e mëtejshme të kërkimeve. A është e mundur që nën Piramidat e Gizës të fshihet një qytet i tërë? Koha do ta tregojë.