Dokumente dhe email-e të pazbuluara më parë, pjesë e një dosjeje nën shqyrtim nga Kongresi Amerikan, hedhin dritë mbi marrëdhënien e gjatë dhe të errët mes Dukeshës së York-ut, Sarah Ferguson, dhe financierit të dënuar Jeffrey Epstein. Sipas këtyre dokumenteve, Fergie ka marrë ndihmë financiare nga Epstein për më shumë se 15 vite – shumë më e lartë se shuma prej 15 mijë paundësh që ajo ka pranuar publikisht.

Email-et tregojnë një lidhje të vazhdueshme dhe të komplikuar: Epstein e përshkruante Fergie si “lypëse” dhe përfitues të pandërprerë të parave të tij, ndërkohë që ajo i kërkonte borxhe për të mbuluar fatura të vogla dhe këmbëngulte për ndihmë për bamirësi dhe projekte personale. Në disa raste, Epstein ka shlyer pagesa për ish-asistentët e Fergie dhe ka këshilluar se çfarë të thoshte para intervistave televizive.

Email-et tronditëse tregojnë gjithashtu se Dukesha kishte marrë pjesë në festimet për lirimin e Epstein nga burgu, duke shoqëruar edhe vajzat e saj, Princeshën Beatrice dhe Eugenie, të cilat në atë kohë ishin 20 dhe 19 vjeç – mosha e shumë viktimave të Epstein.

Ky skandal vjen pak javë pasi Sarah Ferguson dhe Princi Andrew hoqën dorë nga titujt mbretërorë, pas presionit mediatik dhe publik mbi lidhjet e tyre me Epstein. Një burim pranë hetimeve thekson se “Sarah dhe Andrew ishin të zhytur deri në fyt në lidhjet me Epstein. E gjithë kjo kishte të bënte me paranë. Ishte e qartë se kjo do të ishte rënia e tyre.”

Zbulimet e fundit risjellin në qendër të skenës publike ndikimin e madh financiar dhe social të Epstein mbi një pjesë të elitës britanike dhe pasqyrojnë kompleksitetin e marrëdhënieve të fshehta që ai zhvilloi gjatë dekadave.