Arkeologët në Kuvajt kanë bërë një zbulim të jashtëzakonshëm, duke gjetur një figurinë balte që daton rreth 7000 vjet, e cila ka ngjashmëri të habitshme me përshkrimet moderne të pamjes së alienëve. Figurinën, e cila ka vrima të mëdha në hundë, fytyrë të stërgjatur dhe sy të mëdhenj, e zbuluan një grup studiuesish polakë dhe kuvajtjanë në impjantin arkeologjik të Bahra, një vendbanim i lashtë në gadishullin arabik.

Sipas studiuesve, figurinën e vogël mund ta përshkruajmë si një kokë të punuar me mjeshtri, me sy të anuar dhe të mbyllur, një hundë të sheshtë dhe një kafkë që zgjatet nga pas. Zbulimi ka ngjallur interes, pasi ka ngjashmëri të theksuara me përshkrimet e jashtëtokësorëve në kulturën popullore të sotme. Figurinat e tilla nuk janë të zakonshme për komunitetin e Ubaid të periudhës së Neolitit, dhe kjo është hera e parë që gjendet një e tillë në rajonin e Gjirit Persik.

Prof. Piotr Bieliski nga Universiteti i Varshavës, i cili ka komentuar mbi këtë zbulim, theksoi se figurinat si kjo ngrejnë pyetje të mëdha për qëllimin dhe simbolikën e saj, duke sugjeruar mundësinë e përdorimit të saj për rituale ose për qëllime të tjera në atë kohë të largët.

Gjatë kërkimeve të bëra në Bahra janë zbuluar gjithashtu dy tipe të ndryshme poçarie të lidhura me kulturën Ubaid, duke përfshirë “poçarinë e kuqe”, që është hasur edhe në vendndodhje të tjera në gadishullin arabik. Mjeti më interesant që ka dalë nga këto gërmime është një poçe e përgatitur pa ngrohje, që vërteton se ‘Bahra 1’ mund të jetë vendndodhja më e lashtë e poçarisë në rajonin e Gjirit Persik.