Detaje të reja kanë dalë në dritë nga vrasja e dyfishtë që ka tronditur Greqinë, ku një shtetas shqiptar dhe punëdhënësi i tij grek u qëlluan për vdekje nga një autor ende i panjohur. Hetimet e policisë greke kanë zbuluar se krimi mund të jetë kryer me ndihmën e bashkëpunëtorëve, ndërsa një element i ri ka ngritur dyshime të forta mbi motivin e ngjarjes – testamenti i pronarit grek, i hartuar vetëm tre ditë para se ai të vritej.

Sipas gazetës “Protothema”, dokumenti testamentar, i shkruar me dorën e vetë viktimës, përmbante pasazhe që dëshmonin frikën e tij për jetën:

“Po e shkruaj testamentin tim në rast vdekjeje të papritur”, thuhej në fillim të testamentit.

Në dokument, pronari i ndjerë i linte pjesën më të madhe të pasurisë nipit të tij, i cili sipas mediave greke ishte dëshmitar në vendngjarje. Ai e përshkruante nipin si “djalin që e ka rritur dhe që gjithmonë i ka treguar dashuri dhe respekt”.

Një detaj tjetër që ka tërhequr vëmendjen e hetuesve është se në testament pronari kishte përfshirë edhe mikun e tij të ngushtë shqiptar, i cili po ashtu u vra gjatë atentatit.
Në dokument thuhej se shqiptari do të përfitonte 200 mijë euro nga pasuria e tij.

Kjo përputhje e pazakontë ka bërë që hetuesit të mos përjashtojnë pistën e një krimi të lidhur me trashëgiminë. Aktualisht, autoritetet greke po hetojnë me intensitet për të zbuluar nëse personat e përfshirë në testament, apo të afërm të tjerë të pronarit, mund të kenë pasur ndonjë rol në organizimin e ngjarjes.

Ndërkohë, autori i atentatit mbetet në arrati, dhe motivi zyrtar i krimit vazhdon të jetë i paqartë. Policia greke po vijon hetimet për të zbardhur këtë ngjarje që ka tronditur opinionin publik.