Presidenti ukrainas, Volodymyr Zelensky, zhvilloi sot bisedime në Paris me homologun francez, Emmanuel Macron, duke theksuar se përfundimi i luftës në Ukrainë duhet të ndodhë sa më shpejt dhe me një paqe të qëndrueshme.

“Lufta duhet të përfundojë sa më shpejt të jetë e mundur. Shumë gjëra varen nga pjesëmarrja e secilit udhëheqës. Sot do të flasim edhe me udhëheqës të tjerë,” deklaroi Zelensky në një postim në platformën X.

Vizita e tij në Pallatin Elize në Paris shënon një tjetër javë intensive diplomatike, pas takimeve të fundit në Florida mes delegacioneve amerikane dhe ukrainase, të cilat u cilësuan si frytdhënëse nga të dyja palët.

Shefja e politikës së jashtme të Bashkimit Evropian, Kaja Kallas, paralajmëroi se kjo mund të jetë një javë vendimtare për përpjekjet diplomatike drejt paqes. Ndërkohë, i dërguari i posaçëm amerikan, Steve Witkoff, do të zhvillojë të martën takimin e gjashtë me Vladimir Putin që nga janari, në përpjekje për të negociuar një zgjidhje të konfliktit.

Takimet e Parisit dhe Florida-s theksojnë përpjekjet ndërkombëtare për të ndërtuar një konsensus dhe për të krijuar kushtet për një armëpushim të qëndrueshëm në Ukrainë, ndërsa lufta ka hyrë në vitin e katërt.