Presidenti ukrainas Volodymyr Zelensky ka deklaruar se Rusia ka përdorur një raketë balistike të prodhuar në Korenë e Veriut në një nga sulmet e fundit ndaj Kievit, bazuar në “informacione paraprake”.

Në një postim në rrjetin social X (ish-Twitter), Zelensky e cilësoi këtë veprim si një provë të mëtejshme të natyrës kriminale të aleancës mes Rusisë dhe Phenianit.

“Ata vrasin njerëz dhe mundojnë jetët së bashku, ky është kuptimi i vetëm pas bashkëpunimit të tyre,” shkroi presidenti ukrainas, duke shtuar se asnjë vend nuk duhet të lihet vetëm përballë këtyre kërcënimeve. Ai bëri thirrje për presion real ndaj Rusisë për ta ndaluar këtë agresion.

Zelensky theksoi gjithashtu se vazhdimi i sulmeve, edhe mes përpjekjeve diplomatike ndërkombëtare, tregon se “Putini nuk ka frikë”, duke nënkuptuar nevojën për një reagim më të fortë ndërkombëtar.

Kjo deklaratë vjen në një kohë kur shqetësimet për lidhjet ushtarake mes Rusisë dhe Koresë së Veriut janë në rritje, dhe mund të çojnë në tensione të reja globale.