Kreu i Grupit Parlamentar të Partisë Socialiste, Niko Peleshi, deklaroi sot në Kuvend se përzgjedhja e Avokatit të Popullit është më e mundshme të zhvillohet në muajin shtator, pasi kërkon një proces të dakordësuar mes maxhorancës dhe opozitës.

Duke iu referuar kërkesës së opozitës për përfshirjen e këtij procesi në rendin e ditës, Peleshi theksoi se shumica është e hapur për të dëgjuar propozimet, por vendimmarrja duhet të jetë rezultat i një diskutimi të thelluar dhe të ndershëm institucional.

“Të ulemi dhe të dëgjojmë propozimet e opozitës, duke respektuar edhe traditën e propozimeve që vijnë nga opozita, por maxhoranca para se të votojë ka të drejtën të njihet me të gjithë,” – u shpreh Peleshi, duke shtuar se të gjitha kandidaturat e deritanishme janë depozituar nga opozita dhe kanë kaluar filtrat në komisione.

Ai shtoi se kishte zhvilluar më herët një bisedë me deputetin Flamur Noka për të rifilluar procesin pas zgjedhjeve, por sipas tij, me vetëm një seancë parlamentare të mbetur, më e arsyeshme është që procesi të përmbyllet në shtator.

Peleshi siguroi se PS nuk ka asnjë kundërshtim për vijimin e procesit, por kërkoi kohë dhe bashkëpunim për një zgjedhje të dakordësuar.