Në zgjedhjet lokale që po zhvillohen në Maqedoninë e Veriut, disa partitë e vogla kanë shfaqur shenja të ndikimit rus, duke përdorur retorikë dhe veprime që synojnë të ndryshojnë narrativin politik, sidomos për integrimet euroatlantike, sipas analistëve.

Partia më e dukshme në këtë drejtim është Maqedonia e Bashkuar, e udhëhequr nga Janko Baçev, e cila mbështet hapur thellimin e lidhjeve me Rusinë dhe refuzimin e integrimeve në NATO dhe BE. Kandidati i saj për kryetar të Shkupit, Zoran Jovanovski, ka deklaruar se ka krijuar kontakte me biznesmenë rusë, kinezë dhe bjellorusë për investime në turizëm dhe infrastrukturë, duke përmendur gjithashtu ngritjen e një shtatoreje për konsullin rus Aleksandar Arkadjevich Rostkovski.

Një tjetër subjekt joparlamentar me drejtim ideologjik të ngjashëm është partia Rodina, e cila për herë të parë mori pjesë në zgjedhjet lokale të vitit 2021 dhe këtë vit synon kryetarë dhe këshilltarë komunalë, nën moton “Mendo planetarisht, vepro tradicionalisht”. Kandidati i saj kryesor, Zoran Jovançev, ka përdorur retorikë kritike ndaj liderëve perëndimorë, duke përmendur tragjeditë kombëtare në Ukrainë pas zgjedhjes së Volodymyr Zelenskyt.

Edhe pse partitë e vogla zakonisht marrin hapësirë të kufizuar mediatike, analiza e fondacionit Metamorphosis thekson se ndikimi i tyre tek publiku mbetet modest, por jo pa rreziqe, duke u bërë një instrument i mundshëm për përpjekje të Rusisë për të ndryshuar narrativin politik në vend.