Ilaria Sula, një studente 22-vjeçare shqiptare në Fakultetin e Statistikave të Universitetit Sapienza në Romë, është raportuar e zhdukur që nga 25 marsi. Ajo u pa për herë të fundit duke u larguar nga banesa e saj në zonën Furio Camillo, të cilën e ndante me disa shoqe.

Sipas shoqeve të saj, Ilaria u largua nga shtëpia rreth orës 21:30 pa njoftuar se ku po shkonte, një sjellje që nuk ishte e pazakontë për të. Megjithatë, pas disa ditësh pa asnjë kontakt, shqetësimi u rrit dhe familja e saj bëri një denoncim në stacionin e policisë në San Lorenzo.

Autoritetet italiane kanë aktivizuar dhomën e kontrollit në prefekturë dhe kanë njoftuar të gjitha organet dhe shoqatat përgjegjëse për kërkimin e saj. Një nga hipotezat që po shqyrtohet është se zhdukja mund të lidhet me një ndarje të mundshme nga i dashuri i saj.

Familja dhe miqtë e Ilaria Sulës bëjnë apel për këdo që mund të ketë informacion mbi vendndodhjen e saj të kontaktojë autoritetet përkatëse.