Deputetja e Partisë Demokratike, Ina Zhupa, ngriti sot në Kuvend një akuzë të fortë ndaj projektit TID për Durrësin, të cilin e cilësoi si një “plan shkatërrues të trashëgimisë 3000-vjeçare të qytetit”. Sipas saj, pas emërtimit zyrtar si projekt për “përmirësimin e turizmit”, fshihet një ndërhyrje brutale në zonat historike, që do të çojë në shembjen e dhjetëra banesave tradicionale.

Nga foltorja, Zhupa theksoi se projekti nuk synon zhvillim, por “zhdukje të identitetit urban të Durrësit”, duke prekur banesa historike të mbrojtura, ndër to edhe shtëpi që mbajnë elementë të rrallë arkitektonikë si mure otomane të vitit 1502.

“Ju doni që Durrësi 3000-vjeçar të shkatërrohet,” u shpreh deputetja, duke sjellë shembullin e banesës së Isuf Mehmetit, para së cilës ndodhet një mur historik i periudhës osmane, ndërsa sipas projektit pritet të shembet për t’iu lënë vend ndërtimeve të reja.

Zhupa akuzoi ministrinë dhe ADF-në për sjellje “pushtuese”, duke pretenduar se projektimi është bërë pa kritere profesionale dhe pa konsultim me banorët, siç e kërkon ligji.

“Pse keni zgjedhur të jeni pushtues?” – pyeti ajo.
Sipas deputetes, hartuesit e projektit “kanë bërë një shëtitje në Durrës duke vendosur me gisht: kjo shtëpi do të prishet, kjo tjetër jo”, duke e cilësuar planin “më të turpshmin që i është bërë ndonjëherë një qyteti”.

Zhupa publikoi edhe hartën e projektit ku, sipas saj, pikat e kuqe tregojnë shtëpitë që pritet të shkatërrohen, ndërsa pikat e bardha ato që do të ruhen, pa asnjë arsyetim teknik:
“Dy banesa me të njëjtin mur – gjysma prishet dhe gjysma tjetër jo. Cilat janë kriteret?”

Ajo akuzoi ministrinë se ka anashkaluar bashkinë, duke lejuar që një organizatë me interesa private – ADF – të bëjë planin e qytetit, në kundërshtim me ligjin urbanistik.

Në fund, Zhupa kërkoi sqarime për konsultimet me banorët dhe legjitimitetin e procesit të shpronësimeve, duke paralajmëruar se TID rrezikon të kthehet në “masakrën urbane të Durrësit”.