Vlorë – Pesë persona janë proceduar penalisht pas zjarrit të madh që përfshiu ditën e djeshme fushën e grumbullimit të mbetjeve urbane në lagjen “24 Maji” në Vlorë.

Sipas njoftimit të Policisë, mes të proceduarve janë edhe figura kyçe të administratës së qytetit, përfshirë Francesko Tozajn, Drejtor i Ndërmarrjes së Pastrimit pranë Bashkisë Vlorë, dhe Alpin Skëndaj, përgjegjës i Bordit të Kullimit pranë Bashkisë. Po ashtu, janë referuar dhe nisur procedime për tre manovratorë të Bordit të Kullimit: Luan Dalipaj, Endrit Delaj dhe Daniel Islamaj.

Ngjarja ka ndodhur më 7 qershor rreth orës 12:18, kur për shkak të temperaturave të larta shpërtheu zjarri në fushën e mbetjeve. Policia bën me dije se të pandehurit kanë neglizhuar detyrën duke mos ndërmarrë masat e nevojshme për shuarjen e zjarrit në kohë, me pasoja të rënda për ndotjen e mjedisit.

Autoritetet vijojnë hetimet për përcaktimin e plotë të përgjegjësive në lidhje me këtë incident që solli dëme mjedisore dhe shqetësim në komunitetin lokal.