Detaje të reja kanë dalë në lidhje me zjarrin që ra në garazhin nëntokë të një pallati 8-katësh në Komunën e Parisit, Tiranë. Mësohet se nga ngjarja janë lënduar katër persona, mes tyre një nënë dhe dy djemtë e saj, të cilët kanë pësuar djegie dhe ndodhen nën kujdesin e mjekëve. Gjithashtu, një e moshuar ka pësuar lëndime pasi u rrëzua në shkallë gjatë evakuimit dhe po merr trajtim mjekësor.
Zjarri, që dëmtori tre automjete, u vu nën kontroll falë ndërhyrjes së dy mjeteve zjarrfikëse dhe dhjetë efektivëve. Megjithatë, në zonë ende ka prezencë tymi. Paraprakisht dyshohet se shkaku i zjarrit ka qenë një shkëndijë elektrike, ndërsa autoritetet po vijojnë hetimet për të përcaktuar shkaqet e sakta të incidentit.
