Zjarre masive kanë përfshirë kodrat e qytetit të Los Anxhelosit dhe zonat përreth, duke kërcënuar lagjet ku jetojnë shumë yje të Hollivudit. Zjarrfikësit po luftojnë përhapjen e flakëve të nxitura nga erërat e forta dhe moti i thatë, ndërsa banorët janë detyruar të evakuohen në masë.

Zjarret, të dukshme nga distanca të largëta, kanë shkaktuar kaos në rrugët e qytetit, ku banorët kanë braktisur makinat dhe kanë ikur në këmbë për t’i shpëtuar flakëve. Në lagjen “Pacific Palisades”, një zonë e njohur për banorët e saj të famshëm, zjarri ka përfshirë më shumë se 5 kilometra katror tokë. Tymi ka mbuluar qytetin dhe flakët janë përhapur deri në “Venice Beach”, ndërsa zonat kodrinore të Malibusë dhe Santa Monicas janë gjithashtu në rrezik.

Sipas Shërbimit Kombëtar të Motit, erërat e njohura si ato të “Santa Ana” kanë arritur deri në 160 kilometra në orë, duke e bërë të pamundur kontrollimin e zjarreve. Këto kushte atmosferike, të shoqëruara me muaj të tërë pa reshje, kanë krijuar një situatë ideale për përhapjen e flakëve.

Presidenti Joe Biden ka anuluar planet për të vizituar qarkun Riverside dhe do të zhvillojë takime emergjente në Los Anxhelos. Shkollat dhe aktivitetet e tjera publike janë pezulluar për shkak të rrezikut. Ndërkohë, aktori James Woods postoi në rrjetet sociale pamje të zjarreve afër shtëpisë së tij, duke deklaruar se është “në gatishmëri për t’u evakuuar”.

Aktori tjetër, Steve Guttenberg, ka bërë thirrje publike që njerëzit të lënë çelësat në makinat e braktisura për të ndihmuar zjarrfikësit të hapin rrugën.

Për të parandaluar shkëndijat elektrike që mund të shkaktojnë zjarre të reja, rreth gjysmë milioni abonentë rrezikojnë të përballen me ndërprerje të energjisë elektrike. Ndërkohë, autostrada e famshme PCH, që kalon përbri oqeanit, është mbyllur për të lehtësuar evakuimin dhe përpjekjet e zjarrfikësve.

Kalifornia është përballur me një sezon veçanërisht të thatë dhe të ngrohtë, ku reshjet kanë qenë minimale. Që nga fillimi i majit, janë regjistruar vetëm 0.25 cm shi në rajonin jugor të shtetit, duke e bërë zonën jashtëzakonisht të ndjeshme ndaj zjarreve.

Autoritetet vijojnë përpjekjet për të frenuar përhapjen e zjarreve dhe për të siguruar shpëtimin e banorëve dhe kafshëve të rrezikuara. Ndërkohë, banorët janë të detyruar të përballen me një krizë të rëndë që pritet të zgjasë për disa ditë.