POLIÇAN – Vatra e zjarrit që përfshiu pyllin e Poliçanit pasditen e djeshme është vënë nën kontroll paraditen e sotme, duke mos përbërë më rrezik për zonat e banuara.

Sipas autoriteteve vendore, zjarrfikësit vijojnë të qëndrojnë në terren për të neutralizuar vatrat e mbetura dhe për të shmangur riaktivizimin e flakëve.

“Situata është stabilizuar, por ekipet janë ende në gatishmëri. Puna jonë do të vazhdojë deri në shuarjen e plotë të çdo vatre,” deklaroi një përfaqësues i shërbimit zjarrfikës.

Flakët përfshinë pjesën perëndimore të kodrës përreth Uzinës së Armëve, në afërsi të zonës B, duke iu afruar rrezikshëm banesave dhe spitalit të qytetit. Për shkak të rrezikut, një ditë më parë u evakuuan të moshuarit e azilit dhe disa familje në Plirezë.

Zjarrvënia shkaktoi shkrumbimin e një sipërfaqeje të konsiderueshme me shkurre dhe pisha, ndërsa hetimet për përcaktimin e shkaqeve janë ende në proces.