Një zjarr i fuqishëm në zonën e Shëngjinit ka dalë plotësisht jashtë kontrollit, duke detyruar autoritetet të ndërhyjnë nga ajri me helikopter. Gjatë natës, 20 mjete zjarrfikëse dhe personeli përkatës kanë operuar pa ndalur për të shuar flakët, por erërat e forta kanë vështirësuar përpjekjet e tyre.

Forcat zjarrfikëse po punojnë intensivisht për të mbrojtur banesat dhe hotelet, dhe deri tani kanë arritur të shmangin dëmet ndaj objekteve. Operacioni është monitoruar nga Prefekti i Qarkut dhe stafi i tij, nënkryetarët e bashkisë Lezhë, Drejtori i Gadishmërisë, Drejtori i Marrëdhënieve me Jashtë, Drejtori Rajonit Verior në AKMC, Zëvendësministri i Mbrojtjes, Drejtori i Përgjithshëm i MZSH në MB, si dhe forca të shumta policore dhe autoambulanca.

Pavarësisht pranisë së këtyre forcave, kontrolli i zjarrit mbetet i pamundur dhe rrezikon shumë biznese dhe shtëpi banimi. Për shkak të situatës kritike, ndërhyrja nga ajri me helikopter është bërë e domosdoshme në orët e para të mëngjesit për të përpjekur të vënë nën kontroll flakët.