Grupi i ekspertëve, të cilët u ngarkuan nga prokurorët për të hetuar shkakun e zjarrit në Urgjencën Kombëtare pranë Qendrës Spitalore Universitare “Nënë Tereza”, ka konkluduar se ngjarja ka ndodhur për shkak të kushteve të papërshtatshme teknike. Sipas hetimeve, dhoma ku ishin vendosur bateritë nuk kishte ventilim të duhur, duke shkaktuar mbinxehje të UPS-it dhe shpërthimin e tij.

Pajisjet mjekësore, të cilat u zhvendosën nga urgjenca e vjetër në ambientet e reja, u vendosën pa një projekt të duhur zbatimi që do të krijonte kushtet e nevojshme për ruajtjen e pajisjeve të tilla. Komisioni i posaçëm i ngritur për këtë proces nuk ka parashikuar asnjë projekt për menaxhimin e rrezikut të zjarrit, gjë që kontribuoi në shpërthimin që ndodhi. Hetimet po vazhdojnë për të identifikuar personat përgjegjës që duhet të kishin kontrolluar zhvendosjen e pajisjeve dhe për të sqaruar arsyet pse kjo ka ndodhur pa një projekt të miratuar.

Një akt i dytë i realizuar nga Universiteti Politeknik ka vlerësuar dëmin e shkaktuar nga zjarri në rreth 30 milionë lekë. Ngjarja e rrezikshme ndodhi më 11 shkurt të këtij viti, por fatmirësisht nuk pati dëmtime në njerëz.