Carlo Ancelotti do të jetë trajneri i ardhshëm i Kombëtares së Brazilit. Gazeta prestigjioze spanjolle *Marca* raporton se ditët e trajnerit italian në krye të Real Madridit kanë marrë fund.

Sipas burimeve të *Marca*-s, Ancelotti ka arritur një marrëveshje me Federatën Braziliane të Futbollit. Pasi të përfundojë sezonin aktual me “Los Blancos”, ai do të marrë menjëherë drejtimin e “Seleção”, 5 herë kampionëve të botës.

Në marrëveshjen me Real Madridin është rënë dakord që Ancelotti të mos drejtojë ekipin në Botërorin e Klubeve, që do të zhvillohet pas përfundimit të sezonit.

Me këtë hap historik në karrierën e tij, Ancelotti synon të kompletojë arritjet e tij të jashtëzakonshme, duke kërkuar të fitojë edhe Kupën e Botës, pas fitoreve të shumta në nivel klubesh si futbollist dhe si trajner.