Mynih – Kryeministri i Shqipërisë, Edi Rama, gjatë pjesëmarrjes në një panel me temë “Zgjerimi i BE-së”, bëri thirrje për një ritëm më të shpejtë të integrimit të Ballkanit Perëndimor, duke theksuar se Bashkimi Europian duhet të përqendrohet në forcimin e mbrojtjes dhe ekonomisë.

Rama u shpreh se BE-ja duhet të ndajë mendjen për procesin e zgjerimit, duke theksuar se ndryshimet në këtë drejtim po ndodhin tepër ngadalë dhe në mënyrë të kufizuar.

“Ajo që po ndodh është se ndryshon shumë ngadalë dhe shumë pak. Ka ardhur koha për një ndarje të qartë: procesi i bazuar në meritë duhet të jetë vetëm për votën në Këshillin Europian. Nuk mund të nënkuptojë sjelljen e vendeve të BE-së ndaj tregut të përbashkët,” – tha Rama.

Kryeministri shqiptar nënvizoi se procesi i integrimit duhet të përshpejtohet, sidomos në raport me vendet e Ballkanit Perëndimor, duke i afruar ato më shumë me pjesën tjetër të Europës edhe në aspektin ekonomik.

“Nëse e mendojmë Europën pa Rusinë, atëherë kemi një kontinent me 700 milionë banorë – një treg i jashtëzakonshëm,” – theksoi Rama, duke argumentuar se përshpejtimi i integrimit do të sillte përfitime jo vetëm për Ballkanin Perëndimor, por për vetë BE-në.