Pas një vendimi të rëndësishëm të Gjykatës së Romës, 12 emigrantë nga Bangladeshi dhe Egjipti kanë lënë kampin e Gjadrit në Shqipëri dhe janë nisur drejt Italisë. Mëngjesin e 19 tetorit, rreth orës 07:30, një anije e rojës bregdetare italiane mbërriti në Portin e Shëngjinit për të transportuar emigrantët drejt Italisë. Pasi anija u ankorua, emigrantët u transferuan nga kampi në Shëngjin, nën mbikëqyrjen e autoriteteve shqiptare dhe italiane.

Pavarësisht vendimit të gjykatës, mediat italiane, veçanërisht “La Repubblica”, kanë paralajmëruar se qeveria italiane nuk e ka përjashtuar mundësinë e dërgimit të një grupi tjetër emigrantësh në kampin e Gjadrit javën e ardhshme. Në varësi të kushteve të motit, pritet që një anije tjetër me emigrantë të mbërrijë në Portin e Shëngjinit të mërkurën ose të enjten.

Emigrantët e larguar më 19 tetor, të cilët u kapën nga Guardia di Finanza më 13 tetor, u sollën në Gjadër si pjesë e marrëveshjes mes Italisë dhe Shqipërisë, e cila parashikon mbajtjen e përkohshme të emigrantëve në Shqipëri. Procedurat në port zgjatën vetëm disa minuta, dhe rreth orës 09:00 emigrantët u nisën drejt Portit të Barit në Itali.

Vendimi i Gjykatës së Romës u mor më 18 tetor, duke u bazuar në një vendim të mëparshëm të Gjykatës Evropiane të Drejtësisë, e cila ka përcaktuar se Bangladeshi dhe Egjipti janë vende të pasigurta për azilkërkuesit. Si rrjedhojë, gjyqtarët vendosën që emigrantët të mos qëndrojnë në Shqipëri, por të transportohen dhe të mbahen në qendrat e emigrantëve në Itali, sipas ligjit të azilit dhe mbrojtjes ndërkombëtare.

Gjykata e Romës theksoi se duke qenë se Bangladeshi dhe Egjipti konsiderohen vende të pasigurta, Italia është e detyruar të pranojë dhe të mbajë këta emigrantë në territorin e saj, duke iu shmangur mbajtjes së tyre në kampe të huaja ose në territorin shqiptar.