Mbrojtja ajrore e Rusisë ka rrëzuar të paktën 142 dronë gjatë natës dhe mëngjesit të së dielës, në një nga valët më të mëdha të sulmeve ajrore të ndërmarra nga Ukraina që nga fillimi i luftës në vitin 2022. Lajmi është konfirmuar nga Ministria ruse e Mbrojtjes dhe autoritetet lokale në Moskë.

Sipas raportimeve zyrtare, 27 prej këtyre dronëve u rrëzuan mbi rajonin e Moskës, ndërsa objektiv i sulmeve ishin gjithashtu Brijansku dhe Kursku, dy rajone kufitare që shpesh janë goditur nga sulmet ukrainase.

Kryetari i Moskës, Sergey Sobyanin, bëri të ditur se ekipet e shpëtimit janë dislokuar në disa zona të kryeqytetit, ku kanë rënë pjesë të dronëve të shkatërruar. Për momentin nuk ka njoftime për viktima, por autoritetet janë duke hetuar përmasat e mundshme të dëmeve materiale.

Autoriteti rus i aviacionit, Rosaviatsija, njoftoi se katër aeroporte në Moskë ndërprenë përkohësisht fluturimet si masë sigurie pas alarmit për dronët që po i afroheshin kryeqytetit.

Përshkallëzim i përballjes ajrore

Ky sulm vjen një ditë pasi Ukraina ndërmori një tjetër seri sulmesh me dronë në territorin rus, ndërkohë që forcat e Kremlinit bombarduan qytete ukrainase me qindra dronë dhe raketa.

Sipas analistëve, Ukraina po intensifikon përpjekjet për të shkatërruar linjat e furnizimit dhe logjistikës ushtarake në rajonet kufitare të Rusisë. Këto operacione ajrore janë bërë pjesë e strategjisë së Kievit për të dobësuar aftësitë goditëse të Moskës në vijën e frontit.

Situata mbetet e tensionuar në kufirin mes dy vendeve, ndërsa përshkallëzimi i sulmeve ajrore tregon një fazë të re të luftës, me teknologjinë e dronëve që luan një rol gjithnjë e më vendimtar në fushëbetejë.