Partitë politike në Maqedoninë e Veriut kanë edhe 16 ditë kohë për të bindur qytetarët para zgjedhjeve lokale të 19 tetorit, të cilat shihen si një provë gjenerale për zgjedhjet e ardhshme të përgjithshme në vend.

Në garë janë mbi 20 subjekte politike, ndërsa në fushatë është përfshirë edhe Lëvizja Vetëvendosje e Albin Kurtit, e cila ka dhënë hapur mbështetjen për koalicionin VLEN, që bashkëqeveris me VMRO-DPMNE të Hristian Mickoskit. Mbështetja u shpreh publikisht nga ushtruesi i detyrës së ministrit të Mjedisit në Kosovë, Hysen Durmishi, gjatë një tubimi elektoral të këtij koalicioni.

Ky hap nuk është i pari për Vetëvendosjen, e cila më herët ka tentuar të zgjerojë ndikimin edhe në Shqipëri me hapjen e një dege në Tiranë.

Në krahun tjetër, shqiptarët përfaqësohen nga koalicioni Aleanca Kombëtare për Integrim, i udhëhequr nga BDI e Ali Ahmetit dhe aleatët e saj. Fushata e këtij blloku nisi dy ditë më parë, ku fjalimi i Ahmetit me simbole të forta si “shqiponjat” dhe “zagarët” shkaktoi komente dhe debat publik.

Sipas Kodit Zgjedhor, fushata do të zgjasë deri më 17 tetor, kur nis heshtja zgjedhore 24-orëshe, përpara rundit të parë më 19 tetor. Rundi i dytë do të mbahet më 2 nëntor.

Maqedonia e Veriut shkon kështu drejt zgjedhjeve të 8 lokale, që prej vitit 1996. Qeverisja lokale është e ndarë në 80 komuna dhe në Qytetin e Shkupit si njësi e veçantë, i cili ka 10 komuna të brendshme me kompetenca të përbashkëta.