Në një sallë të mbushur plot, para syve të miliona shqiptarëve kudo në trojet shqiptare dhe në të gjithë botën, para 16 vitesh u shqiptuan fjalë që bartnin ëndrra dhe sakrifica të heronjve ndër shekuj: “Kosova, shtet i pavarur, sovran dhe demokratik!”
Më 17 shkurt të vitit 2008, në një mbledhje të jashtëzakonshme, Kuvendi i Kosovës shpalli Kosovën shtet të pavarur. Por, ai që shqiptoi deklaratën e pavarësisë, kryeministri Hashim Thaçi dhe 3 të tjerët, Rexhep Selimi, Jakup Krasniqi dhe Kadri Veseli, sot ndodhen në paraburgim në Hagë.
Ky përvjetor do të përshëndetet me shumë aktivitete, ndërsa në ora 12:00, Kuvendi do të mbajë një seancë solemne. Shpallja e Pavarësisë ishte kurorëzim i një rrugëtimi të gjatë e të vështirë për qytetarët e Kosovës. Ata përjetuan pasojat e spastrimit etnik nga regjimi serb i Sllobodan Millosheviqit, duke rezultuar në një Luftë Çlirimtare (1997-99).
Shumica e shteteve anëtare të BE-së e kanë njohur Kosovën, ndërsa në të gjithë botën ajo është njohur nga 117 shtete. Megjithatë, disa shtete si Qiproja, Greqia, Rumania, Sllovakia dhe Spanja vazhdojnë të mos e njohin. Tani më Kosova ka arritur edhe liberalizimin e vizave, duke e lejuar qytetarët të lëvizin lirshëm në shtetet e Bashkimit Evropian.
