Një incident alarmant ndodhi sot në aeroportin e Brindisit në Itali, ku 184 pasagjerë shpëtuan nga një tragjedi të mundshme pas përfshirjes në flakë të një avioni të kompanisë “Ryanair”. Avioni, i cili kishte si destinacion Torinon, u përfshi nga flakët vetëm pak sekonda para ngritjes në ajër.

Sipas raportimeve nga mediat italiane, një nga krahët e avionit u zjarrit, duke bërë që anëtarët e ekuipazhit të vërejnë tym dhe të hapin menjëherë daljet e emergjencës. Të gjithë pasagjerët u evakuan me shpejtësi dhe, fatmirësisht, asnjëri prej tyre nuk u lëndua.

“Fluturimi FR8826 nga Brindisi në Torino u vonua mëngjesin e sotëm pasi ekuipazhi i kabinës vëzhgoi tym në pjesën e jashtme të avionit. Pasagjerët u zbritën pa incidente dhe u kthyen në terminal me autobus,” njoftoi kompania.

Ky incident ndodhi vetëm dy ditë pas një ngjarjeje tjetër në aeroportin e Bergamos, “Orio al Serio”, ku një avion tjetër i “Ryanair” kishte shpërthyer goma menjëherë sapo ishte ulur në pistë, duke shkaktuar bllokimin e aeroportit për një kohë të gjatë.