Sot, në 25-vjetorin e ndërhyrjes së NATO-s në ish-Jugosllavi, presidentja Vjosa Osmani bëri homazhe në varret e ushtarëve të NATO-s, duke i falënderuar ata që dhanë jetën për të parandaluar shfarosjen e popullit të Kosovës në vitin 1999.

“Në emër të popullit të Kosovës, që ishte në rrezik nga shfarosja në vitin 1999, t’i falënderoj nga zemra secilin nga ushtarët e NATO-s që rrezikuan jetën e tyre për ta shpëtuar tonin,” tha Osmani.

Ambasadori amerikan në Prishtinë, Jeffrey Hovenier, po ashtu, kreu homazhe dhe shkroi:

“Ne kujtojmë dhe nderojmë ushtarët e guximshëm që bënë sakrificën përfundimtare, duke përfshirë oficerët e shefit të garancisë së ushtrisë amerikane, David Gibbs dhe Kevin Reichert”.

Ndërsa ambasadori gjerman Jorn Rohde tha se sulmet e NATO-s nuk janë arsye për festë, pasi ishin përgjegjësi morale për të ndalur gjakderdhjen dhe krimet e Millosheviçit.

Një reagim të pati edhe Presidenti Bajram Begaj, i cili shprehu falenderime ndaj Aleancës dhe Shteteve të Bashkuara të Amerikës për këtë akt historik për shqiptarët dhe rajonin e Ballkanit, ndërsa përkujtoi me nderim heronjtë e UÇK-së dhe viktimat e luftës në Kosovë.

“25 vjet më parë, më 24 mars 1999, NATO ndërhyri për t’i dhënë fund gjenocidit serb në Kosovë. Sot ne përkujtojmë një ngjarje me rëndësi historike për Kosovën dhe të gjithë shqiptarët,” shkroi Begaj.

Urdhrin për fillimin e fushatës bombarduese e kishte dhënë presidenti i Shteteve të Bashkuara të Amerikës, Bill Clinton. Ai atë natë mbajti para popullit amerikan fjalimin historik, duke lajmëruar se kishte urdhëruar Aleancën Atlantike të fillonte operacionin ushtarak, si mundësi e vetme për të përfunduar luftën në Kosovë.

Pas 78 ditëve të sulmeve, bombardimet u ndalën më 10 qershor 1999, me miratimin e Rezolutës 1244 të Këshillit të Sigurimit të Kombeve të Bashkuara. Ndërhyrja e NATO-s në Kosovë mundësoi kthimin në shtëpitë e tyre të më shumë se 800 mijë refugjatëve, personave të zhvendosur brenda dhe jashtë Kosovës.

Më 12 qershor 1999 filloi vendosja e rreth 50,000 ushtarëve nga 36 vende të botës, prej të cilëve 30,000 ishin nga vendet e NATO-s. Sot, 25 vjet pas kësaj ndërhyrjeje, trupat e paqeruajtëse të KFOR-it janë në numër më të vogël, të vendosur në pjesë të ndryshme të Kosovës me mision paqeruajtës.