Apeli i Posaçëm ka shpallur sot vendimin për Arbër Çekajn dhe të arrestuarit e tjerë për trafikimin e 613 kg kokaine, që u kap në Portin e Durrësit.

Apeli i Gjykatës së Posaçme Kundër Korrupsionit dhe Krimit të Organizuar ka shpallur vendimin për Arbër Çekajn, për të cilin ka vendosur dënimin me 14 vite burg.

Ndërsa 8 vjet e 8 muaj burg janë vendosur për Armando Pezakun, dhe 10 vjet e 8 muaj burg për Donaldo Lushajn.

Këto vite janë nga gjykimi i shkurtuar që përfitojnë të arrestuarit, ndërsa pa gjykim të shkurtuar Çekaj ka 21 vite burg, Lushaj 16 dhe Pezaku 13.

Tre vite më parë dhe konkretisht me datën 27 shkurt 2018, Policia sekuestroi një sasi prej 613 kg kokaine që ishte importuar bashkë me ngarkesën e bananeve që ishin porositur nga vetë Arbër Çekaj, asokohe administrator i kompanisë “Arbri Garden”.