Dritan Metaj, shefi i komisariatit të Kurbinit u arrestua këtë të hënë me urdhër të SPAK, si i dyshuar në mbështetje të aktivitetit kriminal të të ashtuquajturit “baroni i drogës”, Gëzim Çelaj, në zonën e Fushë Kuqes, i shpallur në kërkim. Policia e Shtetit zbarkoi në këtë zonë për ekzekutimin e 4 urdhër-arresteve të SPAK dhe përveç kreut të komisariatit Kurbin dhe Çelajt, u shpallën në kërkim edhe Arben Dalipaj, nga Vlora dhe Roland Guza nga Durrësi, të cilët dyshohet se janë larguar më herët jashtë vendit. Operacioni është një vijim i atij “Flakë në Det” më 15 gusht 2023. Kryepolici Muhamet Rrumbullaku, në një konferencë për media bëri me dije se në Fushë Kuqe vijon operacioni për sekuestrimin e pronave në kuadër të këtij operacioni.
‘Në zbatim të vendimit të Gjykatës së Posaçme Kundër Korrupsionit dhe Krimit të Organizuar, po vazhdon operacioni në terren për sekuestrimin e pasurive të luajtshme dhe të paluajtshme të shtetasve Gëzim Çelaj, Nderim Çelaj, Arlind Ismailukaj dhe personat e tjerë të lidhur me ta, duke përfshirë shoqërinë tregëtare, automjete, mjete lundruese dhe asete të tjera.’- tha Rrumbullaku
Dritan Metaj, i arrestuar dhe 3 të tjerët të shpallur në kërkim janë nën akuzë për veprat penale: “Trafikimi i narkotikëve”, kryer në bashkëpunim në kuadër të grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”, dhe për ta Gjykata e Posaçme ka caktuar masën e sigurisë “arrest në burg”.
Në operacionin “Flakë në Det” të 15 gushtit u arrestuan 4 shqiptarë dhe 2 ukrainas, të cilët u kapen në mjetin e vogël lundrues, në afërsi të velierës, të cilës i kishin vënë zjarrin. Ata, sapo panw Policinw, i vunë zjarrin mjetit lundrues dhe me një barkë të vogël shpëtimi, tentuan të largohen, por u kapën në flagrancë. Në të njëjtën kohë të ndërhyrjes nga deti, “RENEA” ndërhyri nga toka, në një lokal në lagunën e Patokut, ku qëndronin disa persona që dyshohet se kishin lidhje me tentativën për të trafikuar lëndë narkotike. Megaoperacioni sapo mjeti lundrues nga laguna e Patokut u nis në drejtimin jug-perëndim. Gjatë megaoperacionit “Flakë në Det” u sekuestruan 2 pistoleta, municion luftarak, shuma të mëdha parash në valuta të ndryshme, 25 celularë dhe sende të tjera, bashkë me 23 kg cannabis sativa e gjetur në det, pranë vendit ku u dogj veliera dhe një gomone, bashkë me GPS.
