Këngëtarja e njohur Shkurte Fejza ka shprehur indinjatën e saj lidhur me vendimin e Federatës së Futbollit të Shqipërisë (FSHF) për të ndaluar transmetimin e këngës së saj “Mora Fjalë” në stadiumin “Air Albania” gjatë ndeshjeve të kombëtares shqiptare.

Gjatë një interviste Fejza përmendi emrin e Andi Verçani*, ish-pjesë e departamentit të komunikimit në FSHF, duke sugjeruar se ai mund të ketë qenë shkarkuar pas ftesës që i ishte bërë për të kënduar këngën “Mora Fjalë” në stadium.

Shkurte Fejza shprehu shqetësimin e saj për këtë vendim, duke thënë se i dukej si një veprim personal ndaj saj dhe ndaj popullit të Kosovës. Ajo shpjegoi se nuk mund ta kuptonte pse ishte ndaluar një këngë që nderon luftën dhe sakrificën e popullit shqiptar.

“Me të thënë të drejtën unë këto ditë e kam kuptu nga mediat dhe e kam ndje veten shumë keq. Ndoshta si çdo dashamir i kësaj këngë, por edhe si çdo atdhetar i ndershëm i këtij kombi të martirizuar, kjo mu ka dok shumë trishtuese, të ndalohet një këngë që e lartëson luftën dhe sakrificën e një populli,” tha Fejza.

Ajo përmendi gjithashtu se ishte ftuar të performonte më 12 tetor, por nuk pati ndonjë mirëseardhje apo falënderim nga FSHF, duke e përshkruar si një injorim të vazhdueshëm të këngës “Mora Fjalë”. Fejza shpjegoi se këngën e saj nuk mund ta gjenin më në faqet zyrtare të federatës dhe se atmosfera në stadiume dhe në studio televizive ishte armiqësore ndaj saj dhe këngës.

“Ka qenë një injorim,” shtoi Fejza, duke shprehur zhgënjimin e saj për këtë veprim dhe duke thënë se nuk arrin të kuptojë nëse ky veprim është kundër saj, këngës, apo popullit të Kosovës.

Për të, ky vendim i FSHF është i paarsyeshëm dhe shumë dëshpërues, duke pasur parasysh se kënga “Mora Fjalë” është një simbol i luftës dhe sakrificës së popullit shqiptar, e cila ka shërbyer si frymëzim për shumë breza.