Prokuroria e Posaçme (SPAK) ka mbyllur hetimet dhe ka çuar për gjykim dosjen e deputetit të Partisë Demokratike, Asllan Dogjani, i cili akuzohet për fshehje pasurie. Dosja është hedhur në short dhe për shqyrtimin e saj është caktuar gjyqtarja Rudina Palloj. Dogjani është paraqitur disa herë përpara SPAK-ut, por ka deklaruar për mediat se ka bërë kallëzim lidhur me vjedhjen e pronës publike në Tiranë.
Më 3 korrik 2024, Dogjani u paraqit për herë të parë në SPAK, ku qëndroi për rreth dy orë e gjysmë. Gjatë atij takimi, ai ka sqaruar se ishte marrë në pyetje lidhur me disa ankesa të qytetarëve për zaptimin e hapësirës publike nga pronari i një pallati. Dogjani ka theksuar se hetimi ishte në lidhje me këtë çështje dhe jo për ndonjë veprim të tij personal.
