Një shofer kamioni, Patrick McKinney, 23 vjeç, është arrestuar nga autoritetet britanike për kontrabandimin e 14 shtetasve shqiptarë, të cilët u fshehën në një kamion që përdoret për transportimin e bagëtive. McKinney, i cili është shtetas irlandez, u ndalua nga policët kufitarë më 11 dhjetor në terminalin e trageteve në Loch Ryan, Dumfries dhe Galloway.

Hetimet kanë zbuluar se McKinney ka lehtësuar hyrjen e paligjshme të emigrantëve shqiptarë në Britani, duke i transportuar ata në kushte të pasigurta. Zyra e Brendshme e Britanisë tha se hetimet janë ende në vazhdim dhe se po bëhen përpjekje të mëdha për të luftuar kontrabandën e njerëzve.

Anthony Hilton, Drejtues i Hetimeve Kriminale dhe Financiare në Zyrën e Brendshme, theksoi se hetimi po vazhdon me shpejtësi dhe po punohet për të parandaluar veprimtarinë e kontrabandistëve që shfrytëzojnë kufijtë dhe rrezikojnë jetët e njerëzve të dëshpëruar për përfitime financiare.