Kryetari i Këshillit Kombëtar të Partisë Demokratike, Edi Paloka, ka reaguar pas vendimit të Apelit të Posaçëm për të caktuar masën e “detyrimit të paraqitjes” ndaj kryedemokratit Sali Berisha. Përmes një postimi në rrjetet sociale, Paloka ka theksuar se ndaj Berishës po kufizohen liritë dhe të drejtat e tij, edhe pse nuk ka asnjë provë apo fakt kundër tij.

Në reagimin e tij, Paloka ka krahasuar situatën e Berishës me atë të kryebashkiakut të Tiranës, Erion Veliaj, i cili, sipas tij, vazhdon të jetë i lirë, pavarësisht akuzave për katër vepra penale të vërtetuara ndaj tij. Paloka e ka quajtur drejtësinë aktuale një “pjellë të djallit Soros”, duke kërkuar llogaridhënie dhe ndëshkim për ata që, sipas tij, kanë shpërdoruar sistemin e drejtësisë.

“Pra Velina e bashkisë me katër vepra penale të vërtetuara bredh i lirë dhe bën ç’të dojë, kurse Berishës i kufizohet liria dhe të drejtat, megjithëse pas viteve të tëra hetimesh, nuk kanë asnjë fakt kundër tij”, ka shkruar Paloka, duke përfunduar me një thirrje për llogaridhënie të atyre që, sipas tij, po përdorin drejtësinë për motive politike.