Sekretari i Përgjithshëm i Partisë Lëvizja Socialiste për Integrim (PL), Tedi Blushi, ka reaguar ashpër pas vendimit të drejtësisë për masën detyrim paraqitje ndaj kryetarit të Partisë Demokratike, Sali Berisha. Në një postim në rrjetet sociale, Blushi e quajti këtë vendim një “krim kushtetues” dhe një “turp të ri për drejtësinë e kapur.”

Asnjë surprizë nga vendimi absurd i Drejtësisë me Regji ndaj liderit historik të Partisë Demokratike, Prof.Dr. Sali Berisha.
Ky krim kushtetues është një turp i ri për drejtësinë e kapur, që ka nisur prej kohësh fushatën elektorale me dhe për Edi Ramën për të siguruar mandatet e përjetshme duke persekutuar liderët e opozitës, Ilir Meta dhe Sali Berisha.
Ndërkohë provat e korrupsionit të përbindshëm për Edi Ramën ulërasin nga Shqipëria në SHBA, nga megaafera e inceneratorëve te çështja McGonigal, por afërmendsh ai livadhis i lirë krah për krah me Erion Veliaj (që duhej të ishte marrë i pandehur 8 vite më parë) dhe thithlopat e tjera të taksave të shqiptarëve sepse “Drejtësia e Re” është ulur në gjunjë para tyre duke e shndërruar peshoren e barazisë para ligjit në hanxhar kundër opozitës.
Tradhti e lartë kombëtare ndaj qytetarëve të thjeshtë që mezi kanë pritur fundin e pandëshkueshmërisë në nivelet më të larta shtetërore.

Blushi shtoi se ky vendim është pjesë e një fushate të nisur prej kohësh për të përndjekur liderët e opozitës, duke përmendur emrat e Ilir Metës dhe Sali Berishës. Ai theksoi se në vend që të merret me provat e korrupsionit të përbindshëm ndaj Edi Ramës, nga megaaferat e inceneratorëve deri tek çështja McGonigal, drejtësia është duke u përdorur për të persekutuar opozitën. Në fund, Blushi e quajti këtë një tradhti të lartë kombëtare ndaj qytetarëve që kanë pritur fundin e pandëshkueshmërisë në nivelet më të larta shtetërore.