Kreu i Partisë Demokratike, Sali Berisha, u paraqit sot në ambientet e SPAK për të respektuar masën e sigurisë “Detyrim paraqitje”, të vendosur nga Apeli i GJKKO. Në një deklaratë për mediat pas seancës, Berisha nuk i kurseu akuzat ndaj strukturës së posaçme, duke e cilësuar atë si një organizatë që bashkëpunon me krimin.

“Organizata kriminale SPKAP i partisë kërkoi që Berishës t’i kthehet arresti në shtëpi me arsyetimin se unë mund të prish provat. Do të sulmoj të gjithë ata që bashkëpunojnë me krimin,” deklaroi Berisha me tone të ashpra.

Ai shtoi se do të paraqesë prova që, sipas tij, tregojnë mënyrën se si kreu i SPAK-ut, Altin Dumani, po manipulon çështjet:

“Do faktoj sot se si Dumani fle mbi dosje krimi dhe se si në deklaratat e tyre pretendojnë për një apartament me 380 metra katrorë, ndërsa ekspertët i kërkojnë të vlerësojnë ndërtimet me 500 metra katrorë nga vitet ’70.”

Berisha e akuzoi Dumanin si një “kryekriminel elektoral”, duke thënë se ai ka mbyllur dosje të rëndësishme që lidhen me krime zgjedhore.

Në fund të deklaratës së tij, ai përmendi edhe ish-zyrtarin e FBI-së, Charles McGonigal, duke pretenduar se ky i fundit kishte dhënë udhëzime për veprime të caktuara brenda SPAK-ut:

“Aty gjeta McGonigalin që po i bënte kurs Dumanit, i tregonte se si duhet të vepronte herët e tjera. Kjo mund t’ju duket çudi, por është e vërteta,” tha Berisha.

Seanca e sotme dhe deklaratat e ish-kryeministrit pritet të ndezin sërish debatet politike dhe mediatike në vend.