Sali Berisha, kreu i Partisë Demokratike, ka hedhur akuza të rënda ndaj deputetit Taulant Balla, duke e quajtur atë pjesë të një “organizate kriminale”. Gjatë një deklarate për mediat, Berisha ka publikuar një dokument që daton më 10 shkurt 2020, sipas të cilit Balla ka negociuar me bandën e Elbasanit për arrestimin e kundërshtarëve politikë në këmbim të garancisë për votat në zgjedhje.
Sali Berisha: Do ju jap dokumente se kjo këtu është një organizatë kriminale. Më dt. 10.02.2020, target është njeri nga banditët e bandës së Elbasanit, informon me telefonin e tij, se kishin rënë dakord mes tyre që të mos i kërkonin Taos tender publik apo favore të tjera, përveç atyre që kishin rënë dakord. Taos i dhanë afat deri në dhjetor. I kishin kërkuar arrestimin e kundërshtarëve. Tao i tha: ‘a garantoni se ata do të votojnë të gjithë për në, nëse ne burgosim ata që doni ju’. ‘Po’, ishte përgjigja. Më pas, Tao tha se ata do të shkojnë në burg. Tao është Taulant Balla, është një kriminel, kjo është një nga të dhënat e shumta që ka në dosje. Ata shkuan në burg në mars 2021, para zgjedhjeve. Tao merr përsipër me listë arrestimin dhe në kundërpërgjigje merr garanci për votat. Ky është vetëm një aspekt i dokumenteve të pafunda që kam për organizatën kriminale, SKAP.
Berisha ka theksuar se në këtë bisedë, Balla (i njohur si Tao) i ka kërkuar bandës që të mos kërkojnë favore të tjera, përveç atyre që ishin dakorduar, dhe ka kërkuar që ata të siguronin votat për Partinë Socialiste në këmbim të dërgimit të kundërshtarëve në burg. Berisha ka akuzuar Ballën për manipulim të zgjedhjeve dhe lidhje me krimin e organizuar, duke thënë se disponon dokumente që hetojnë përfshirjen e tij në këto aktivitete.
