Shërbimet e Policisë Kufitare në pikën e kalimit kufitar të Morinës kanë arrestuar një shtetas 27-vjeçar nga Tirana, i cili kishte thyer masën e sigurisë “Arrest në shtëpi”.

I ndaluari, shtetasi L. L., ishte vendosur nën këtë masë sigurie nga Gjykata e Shkallës së Parë të Juridiksionit të Përgjithshëm në Tiranë, për akuzat e “Mbajtjes pa leje dhe prodhimit të armëve, armëve shpërthyese dhe municionit”, “Prishjes së qetësisë publike”, dhe “Kanosjes”.

Kapja e tij u bë e mundur falë verifikimeve të kujdesshme të kryera nga Policia Kufitare, në kuadër të masave për ndalimin e shtetasve të shpallur në kërkim dhe parandalimin e hyrje-daljeve të parregullta në kufi.

Procedurat e mëtejshme për rastin do të kryhen nga Drejtoria Vendore e Policisë Tiranë. Policia vijon punën për të garantuar respektimin e ligjit dhe forcimin e masave të sigurisë në pikat kufitare.