Një ngjarje e rëndë ka ndodhur në zonën e Astirit, ku një vajzë 21-vjeçare, Sajma Qordja, është gjetur e dhunuar dhe e ngujuar në një apartament nga disa persona. Pas një denoncimi nga babai i saj, Forcat RENEA ndërhynë dhe shpëtuan vajzën që ndodhej në gjendje të rënduar psikologjike.

Sipas autoriteteve, ndërhyrja e policisë ka zbuluar dy armë zjarri pistoletë dhe shenja kokaine në një apartament tjetër të marrë me qira nga dy të dyshuarit. Dëshmitarët dhe banorët e pallatit raportuan se kishin dëgjuar të shtëna armësh, ndërkohë që dyshohet se personat që mbajtën vajzën peng mund të kenë ikur para mbërritjes së forcave të sigurisë.

Policia ka identifikuar një të dyshuar, një 21-vjeçar që kishte marrë me qira apartamentin dhe dyshohet të jetë i dashuri i Sajmës. Ai është kapur nga kamerat e sigurisë duke përdorur një “Audi Q7” me targa angleze, dhe tani po punohet për ta lokalizuar.

“Rreth orës 14:10, u bë hapja e derës së banesës nga Forcat “Renea”, nuk pati probleme. Shtetasja S.Q, ndodhet nën asistencën e stafit mjekësor. Nga këqyrja paraprake nuk konstatohen shenja të dukshme fizike. Gjithashtu, gjatë kryerjes së veprimeve të ngutshme hetimore dhe kontrollit të apartamenteve të tjera në pallatin në fjalë, në një banesë tjetër janë gjetur 2 armë zjarri pistoletë. Brenda kësaj banese nuk janë gjetur persona në momentin e kontrollit”, njoftoi zyrtarisht policia.

Pas shpëtimit, vajza është dërguar për asistencë mjekësore, dhe për momentin nuk janë konstatuar shenja të dukshme dhune fizike. Hetimet vazhdojnë për zbardhjen e ngjarjes dhe identifikimin e personave të tjerë të përfshirë në këtë ngjarje kriminale.