Ish-banori i Big Brother VIP, Petro Xhori, i ftuar në emisionin “Big Brother VIP Fan Club”, ndau me publikun momente të ndjera dhe të dhimbshme nga jeta e tij personale pas daljes nga shtëpia më e famshme në Shqipëri.

Petro tregoi se, gjatë qëndrimit në shtëpi, mendja e tij ka qenë vazhdimisht te familja, veçanërisht te babai dhe motra, duke theksuar se kjo ishte arsyeja pse shpesh nuk e përfshinte veten në debate të ashpra apo momente dramatike brenda spektaklit.

“Ato 10 ditë mund të duken pak për ata që janë jashtë, por për ne brenda janë shumë më shumë. Pjesa ime familjare ishte një arsye që më penalizoi. Gjatë gjithë kohës e kisha mendjen tek babai dhe tek motra që kisha lënë jashtë,” rrëfeu ai me sinqeritet.

Gjatë intervistës, Petro foli për sfidat që ka kaluar në jetë, duke përmendur humbjen e nënës dhe gjendjen e rënduar shëndetësore të babait, i cili është i paralizuar. Petro u shpreh se këto përvoja e kanë formuar si njeri emocional dhe i ndjeshëm ndaj të tjerëve.

“Jam një njeri që, si shumëkush, kam pasur sprovat e mia. Këto më kanë mësuar që të mos prek emocionet dhe zemrat e të tjerëve,” tha Petro, duke prekur audiencën me fjalët e tij.

Petro përmendi se mendimet për motrën e tij kanë qenë një motiv kryesor gjatë qëndrimit në Big Brother, duke theksuar rëndësinë e lidhjeve familjare dhe përkushtimin e tij ndaj tyre. Ai shtoi se, pavarësisht gjithçkaje, nuk e kishte përdorur historinë personale për viktimizim, por e ndjeu të nevojshme të ndante këtë moment të sinqertë me publikun.

“Dua të shprehem realisht sepse e di që nuk do të kem një moment tjetër për t’u shprehur,” përfundoi ai.

Ky rrëfim emocional i Petros i dha një tjetër dimension të personalitetit të tij dhe u prit me shumë mbështetje nga publiku dhe ndjekësit e tij besnikë.