Prokuroria pranë Gjykatës së Shkallës së Parë të Juridiksionit të Përgjithshëm Tiranë, pas një hetimi të gjatë dhe të thelluar, ka shpallur në kërkim shtetasin Oltion Buzi për evazion fiskal, lidhur me një rast të evidentuar të shmangies nga taksat të një subjekti tregtar. Hetimi ka zbuluar se subjekti “Buzi Sport” ka dështuar të deklarojë një total prej 3.7 milionë eurosh të ardhura.

Në kuadër të hetimit të procedimit penal nr. 8744, të vitit 2024, hetuesit zbuluan përdorimin e një sistemi kompjuterik të paautorizuar, që operonte përmes platformës online të palicencuar “store.dyqanimen.com”, për të lëshuar fatura të falsifikuara. Ky sistem mundësonte lëshimin e faturave tatimore që nuk përmbushnin kërkesat e legjislacionit dhe ishin të pa fiskalizuara.

Hetimet treguan se “Buzi Sport” përdorte këto praktika për të deklaruar shifra më të ulëta se sa shuma reale e të ardhurave, duke shmangur kështu pagesën e detyrimeve tatimore. Gjatë kontrolleve të ushtruara në 8 adresa të lidhura me aktivitetin e këtij subjekti, u sekuestruan prova materiale, përfshirë pajisje kompjuterike dhe vlera monetare prej 8 milionë lekësh që nuk ishin të justifikuara me dokumente ligjore.

Njëkohësisht, u ekzekutua vendimi i Gjykatës për kontrollin e vendeve të ushtrimit të aktivitetit nga ky subjekt, dhe hetimet vazhdojnë për zbardhjen e mëtejshme të rrethanave dhe identifikimin e personave të tjerë të përfshirë në këtë skemë evazioni fiskal.