Kandidatja për kryetare të PD-së Edit Harxhi ka folur për mediat pasi votoi për drejtuesin e ri të demokratëve.

Sipas saj janë penguar të votojnë themelues të PD-së me pretendimin se nuk kanë qenë aktiv në fushatë.

“PD është një aset, është një pasuri kombëtare, sot është dita e demokratëve, uroj shumë që të ketë një pjesëmarrje masive, pasi ne sot votojmë reformimin e PD-së. Absolutisht që mendoj se në radhë të parë do të fitojnë demokratët, jam e sigurt që vota e tyre do të jetë për ndryshimin.

Unë dua të bëj një thirrje për zotin Basha, demokratët duhet të jenë në lista, janë penguar themelues të PD-së që të votojnë, me pretendimin se nuk kanë qenë aktiv në fushatë. Kjo nuk është normale, ndryshimi ynë do të sjellë votën e hapur për të gjithë shqiptarët”, tha Harxhi.

E pyetur nëse do të largohet nga PD nëse humbet garën, Harxhi thotë se: “Beteja ime fillon sot, Absolutisht që unë do të vazhdoj aktive edhe pas 30 vitesh, ju thashë që beteja ime fillon sot”.