Një studim i fundit nga Instituti Wellcome Sanger në Mbretërinë e Bashkuar, publikuar në revistën shkencore Nature, ka zbuluar se jo të gjitha dëmet në ADN riparohen nga qelizat. Disa nga këto dëmtime mund të mbeten dhe të rezistojnë për muaj apo vite, duke rritur ndjeshëm rrezikun e mutacioneve të dëmshme, që mund të çojnë në zhvillimin e sëmundjeve të rënda, përfshirë kancerin.

Me kalimin e kohës, qelizat e organizmit akumulojnë gabime në gjenome, duke ndikuar drejtpërdrejt në “librin e jetës”. Një ndryshim i vetëm në renditjen e shkronjave të ADN-së mund të shkaktojë mutacione të rëndësishme. Në shumicën e rasteve, mekanizmat e riparimit qelizor korrigjojnë këto gabime, por studimi tregon se kjo nuk ndodh gjithmonë.

Ky zbulim është thelbësor për të kuptuar më mirë sesi mutacionet ndodhin dhe si ndikon kjo në zhvillimin e sëmundjeve tumorale. Ekspertët besojnë se studimi do të ndihmojë në parashikimin dhe trajtimin më të mirë të këtyre sëmundjeve në të ardhmen.