Edison Oruqi, një 39-vjeçar nga lagjja “Kiras” në Shkodër dhe baba i tre fëmijëve, është zhdukur pa gjurmë prej katër ditësh. Ai ishte duke punuar në lumin e Shalës kur humbi kontaktet me familjen, ndërsa zhdukja e tij mbetet ende një mister.

Sipas dëshmive të bashkëpunëtorit dhe familjarëve, Oruqi është parë për herë të fundit teksa punonte në një bujtinë, por që nga ajo ditë nuk ka asnjë gjurmë të tij.

Familja e tij është alarmuar dhe ka kërkuar ndihmën e autoriteteve për gjetjen e tij. Ndërkohë, policia ka nisur kërkimet dhe po heton pistat e mundshme të zhdukjes së tij.

Skënder Pepkolaj, një nga bashkëpunëtorët, thotë se Edisonin e ka marrë vëllai i pronarit për të ngarkuar materiale ndërtimi dhe i ka thënë se do ta rikthente nesër.

Pas përfundimit të punës, ai ka komunikuar se punëtori është lënë në një ishull të vogël me rërë.

Ka qenë vetë Pepkolaj që ka bërë denoncimin në polici për zhdukjen e Edisonit, i cili ishte ndihmësi i tij në punën ndërtimore.

Policia e Shkodrës ka zhvilluar disa kontrolle në lumin e Shalës, por deri tani nuk ka arritur të gjejë asnjë rezultat.