Departamenti Amerikan i Shtetit ka mbyllur faqen zyrtare të internetit që informonte qytetarët mbi mundësinë e përzgjedhjes së një gjinie alternative në pasaportat amerikane. Ky hap u ndërmor vetëm një ditë pasi presidenti Donald Trump firmosi një urdhër ekzekutiv, i cili përcakton se qeveria federale do të njohë vetëm dy gjini – mashkull dhe femër.

Më parë, qytetarët amerikanë mund të përzgjidhnin në pasaportat e tyre një nga tre opsione gjinore: mashkull (M), femër (F) ose X, që përfaqësonte një identitet të papërcaktuar ose alternativ. Faqja informuese theksonte se aplikantët nuk kishin nevojë të paraqisnin dokumentacion mjekësor për të ndryshuar gjininë e shënuar në pasaportë. Tani, kjo faqe është mbyllur dhe ridrejton përdoruesit në një seksion të përgjithshëm për pasaportat.

Në urdhrin e tij ekzekutiv, Trump argumentoi se gjinia është e pandryshueshme dhe bazohet në realitetin themelor dhe të pakundërshtueshëm. Ky vendim përmbys politikat e mëparshme që zgjeruan të drejtat e personave transgjinorë dhe jo-binarë në dokumentet zyrtare.

Vendimi është pritur me entuziazëm nga mbështetësit e Trump, të cilët e konsiderojnë një mbrojtje të vlerave tradicionale dhe familjare, ndërsa ka shkaktuar kritika të ashpra nga grupet që mbrojnë të drejtat e komunitetit LGBTQ+.