Në mbrëmjen e sotme, ceremonia e “Topit të Artë 2024” po zhvillohet për të vlerësuar futbollistët më të mirë të Kombëtares shqiptare. Gjatë ceremonisë, çdo lojtar i Kombëtares ka nominuar “Lojtarin e Vitit”, dhe me 14 vota nga kolegët, fituesi është kapiteni Berat Gjimshiti.

Për shkak të angazhimeve me ndeshjen e ardhshme që e pret të mërkurën, Gjimshiti nuk mund të ishte i pranishëm në ceremoni, dhe trofeun e pranoi nëna e tij, Sevime Gjimshiti.

Me shumë emocion, Sevime Gjimshiti falënderoi të gjithë ata që e kanë vlerësuar djalin e saj: “Faleminderit shumë për këtë dhuratë shumë të çmueshme që ia keni besuar Berat Gjimshitit! Më vjen keq që ai nuk gjendet këtu, por na ka dërguar ne prindërve që të jemi këtu për këtë dhuratë kaq të çmueshme, për këtë çmim kaq të madh,” tha ajo.