Prodhuesi evropian i Coca-Cola, Coca-Cola Europacific Partners Belgium, njoftoi dy ditë më parë një tërheqje masive të produkteve të saj nga tregu evropian për shkak të përmbajtjes tepër të lartë të klorit në disa kanaçe dhe shishe prej qelqi të markave si Coca-Cola, Sprite, Fanta etj. Vendimi prek produkte me kod prodhimi nga 328 GE deri në 338 GE, të cilat janë tërhequr nga raftet e dyqaneve, dhe kompania ka vazhduar të ndërmarrë hapa për të siguruar që asnjë produkt i mbetur të mos mbetet në treg.

Por, çfarë ndodh në Shqipëri? Aktualisht, nuk ka asnjë reagim nga ana e kompanisë së Coca-Cola për të treguar nëse produkte me përmbajtje të lartë klori kanë hyrë në tregun shqiptar. Ky është një shqetësim, pasi është një produkt që konsumohet gjerësisht nga të gjithë, përfshirë fëmijët dhe të moshuarit, dhe niveli i lartë i klorit mund të shkaktojë sëmundje të rrezikshme, duke përfshirë kancerin, dëmtime të sistemit imunitar, shikimin dhe sistemin nervor.

Eksperti i Sigurisë Ushqimore, Kapllan Sulaj, ka bërë thirrje për një kontroll të menjëhershëm të produkteve Coca-Cola në Shqipëri, duke theksuar mundësinë e pranisë së këtij kontaminimi. “Mendoj që duhet të fillojë menjëherë investigimi dhe kontrolli i Coca-Colës në Shqipëri, pasi një fenomen i tillë mund të jetë edhe pse nuk është verifikuar asgjë. Përderisa ekziston një mundësi kontaminimi në Bashkimin Evropian, edhe në Shqipëri është e mundur,” tha Sulaj. Ai ka sugjeruar që autoritetet përgjegjëse, si Autoriteti Kombëtar i Ushqimit, të ndërmarrin hapa për të kontrolluar nëse ka produkte të kontaminuara që hyjnë në Shqipëri.

Ky rast është vetëm një nga shumë shqetësime për Coca-Cola në Shqipëri. Pak kohë më parë, KLSH zbuloi një seri shkeljesh gjatë procesit të asgjësimit të pijeve të skaduara nga subjekti “Coca-Cola”, duke ngritur dyshime për mungesën e transparencës dhe zbatimin e ligjit. Dyshimet ishin se produktet e skaduara mund të ishin rifutur në treg, një shqetësim që pati gjithashtu heshtje nga autoritetet.

Në këtë kuadër, është e domosdoshme që autoritetet shqiptare të bëjnë kontroll dhe të sigurojnë transparencë për të mbrojtur shëndetin e qytetarëve, duke i dhënë përgjigje pyetjes se a është Shqipëria e prekur nga kontaminimi i mundshëm i këtyre produkteve.