Një rast i tmerrshëm dhunimi ka dalë në dritë në Greqi, ku një 3-vjeçar ka përjetuar abuzime brutale nga vetë nëna dhe njerku i tij. Eksaminimi mjekësor ka zbuluar se fëmija, i cili është në gjendje kritike dhe i intubuar, ka pësuar dhunë të jashtëzakonshme, duke përfshirë djegie cigaresh dhe mavijosje të rënda në të gjithë trupin.
Fëmija, i identifikuar si Angelos, po lufton për jetën në spitalin e Heraklion në Kretë, ndërsa mjekët bëjnë përpjekje për të shpëtuar jetën e tij. Dëmtimet e tij janë të tmerrshme dhe kanë prekur edhe trurin, duke shkaktuar “dëm të pakthyeshëm”.
Detajet e mjekësisë janë tronditëse:
- Mavijosje shumë të mëdha në ballë dhe gërvishtje në veshin e djathtë
- Dëmtim të thellë në hundë dhe mavijosje të vjetra pranë nofullës
- Djegie cigaresh në dorën e majtë dhe plagë të shumta në trup, përfshirë edhe në zonën intime
- Kontuzion i mëlçisë dhe dëmtime të rënda të trurit
Në lidhje me ngjarjen, George Kalliakmanis, presidenti i oficerëve të policisë së Atikës Juglindore, ka deklaruar se ky është një rast i paprecedentë dhe çnjerëzor, duke shtuar se fëmija ka përjetuar dhunë ekstreme, duke përfshirë goditje me shkopinj dhe dërrasa.
Nëna dhe njerku i fëmijës janë arrestuar dhe dënuar me paraburgim të përkohshëm, ndërsa hetimet vazhdojnë për zbardhjen e plotë të ngjarjes. Ky rast tronditës ka nxitur reagime të forta nga autoritetet dhe shoqëria për dënimin e këtij tipi të dhunës.
