Engjëll Cani, babai i Martinit, 14-vjeçarit të vrarë me thikë nga një bashkëmoshatar në afërsi të shkollës “Fan Noli” në Tiranë, kërkon drejtësi për të birin. Ai dhe bashkëshortja e tij po trajtohen me psikologë, ndërsa dhimbja në familje mbetet e pamatshme.

“Nuk kemi ende asnjë informacion nga drejtësia. Djali tjetër nuk e pranon humbjen dhe ende pyet se kur do të vijë Martini,” shprehet Cani.

Familja e Martinit ka hapur një llogari “GoFundMe”, e cila do të shërbejë për mbështetje, por edhe për krijimin e një fondacioni që ndihmon fëmijët me ëndrrën e Martinit – sportin. Motoja e iniciativës është “Ëndrra vazhdon”.

Nëpërmjet platformës www.martincani.al, qytetarët mund të kontribuojnë dhe të ndihmojnë familjen. “Kjo ngjarje nuk duhet të harrohet. Nuk është një aksident, por diçka që duhet të ngrejë të gjithë shqiptarët,” thekson Ardit Gavani, një nga iniciatorët e fushatës.

Engjëll Cani: Disa shqiptarë të Amerikës dhe Arditi kanë bërë një kontribut, kanë hapur një webside dhe nusja e vëllaut tim ka hapur një GoFund.

Ardit Gavani: Unë kam një kompani programimi që punoj me shqiptarë në Amerikë dhe jemi një grup që kemi menduar të ndihmojmë familjen dhe të ngremë një memorial online, e cila do të shërbejë dhe për fondacione në të ardhmen që nuk do të jetë vetëm për këtë kauzë, por edhe do të vazhdojë. Në mënyrë prioritare do të jetë për kauzën “Drejtësi për Martinin”, por do të vazhdojë dhe për të rinjtë që kanë ëndrrën që Martini kishte, pra ëndrrën e futbollit, ëndrrën e sportit… Motoja është “ëndrra vazhdon”.