Tiranë – Kryeministri i Greqisë, Kyriakos Mitsotakis, ka mbërritur sot në Katedralen “Ngjallja e Krishtit” në Tiranë, ku po zhvillohet ceremonia mortore e Kryepeshkopit Anastas Janullatos. Mitsotakis shoqërohet nga një delegacion i gjerë, përfshirë pesë ministra të kabinetit të tij qeveritar.

Pas nderimeve për Kryepeshkopin Anastas, kryeministri grek është afruar pranë Kryeministrit të Shqipërisë, Edi Rama, dhe liderit të opozitës, Sali Berisha. Ceremonia drejtohet nga Patriarku Ekumenik i Kostandinopojës, Bartolomeu, dhe po zhvillohet në prani të personaliteteve më të larta të politikës dhe klerit ortodoks nga mbarë bota.

Në këtë shërbesë lamtumire marrin pjesë liderët e Kishave Ortodokse, krerët më të lartë të shtetit shqiptar dhe përfaqësues nga vende të ndryshme. Nga Vatikani ka mbërritur një delegacion i drejtuar nga Sekretari i Shtetit, Pietro Parolin. Po ashtu, janë të pranishëm Patriarku i Jerusalemit, Theofili; Kryepeshkopi i Greqisë, Jeronimi; si dhe përfaqësues të lartë të Kishave të Qipros, Aleksandrisë, Bullgarisë dhe Rumanisë.

Gjithashtu, në ceremoni marrin pjesë klerikë nga Polonia, drejtues të “Saint Egidio” në Itali, delegacione nga Këshilli Botëror i Kishave, organizata “Fetë për Paqen”, si dhe përfaqësues të Kishave nga Shtetet e Bashkuara të Amerikës.

Kryepeshkopi Anastas Janullatos, i cili shërbeu për më shumë se tre dekada në Shqipëri, është vlerësuar për kontributin e tij në ringritjen dhe forcimin e Kishës Ortodokse Autoqefale të Shqipërisë, si dhe për përpjekjet e tij për dialog ndërfetar dhe paqe në rajon.